Allar skilgreiningar fylgja með (Reykjavík 1900, Hjörsey55, ISN93, ISN2004 og WGS84 auk algengra forma s.s. hornsönn keiluvörpun Lamberts, UTM og Gauss-Krüger vörpun, Cartesiushnit eða landfræðileg hnit). GPS ákvarðar hæðir miðað við sporvölu (ellipsoid) og er talsverður munur á þeirri hæð og meðal sjávarhæð (MSL). GPS handtæki nota gróf líkön til að varpa GPS hæðum yfir í meðal sjávarhæð. Sé tekið tillit til þess að hæðarnákvæmni búnaðarins er upp á fleiri metra þá hefur það sýnt sig að þessi grófu líkön eru nægileg. Fyrir nákvæmari vinnu býður Cocodati upp á vörpunaraðferð byggða á NKG96 láfleti (geoid). Þar er hægt að ná fram "absolut" nákvæmni niður fyrir 1m og upp á nokkra cm "relative". Cocodati leyfir útreikninga á einum punkti eða mörgum sem er að finna í einni skrá. Forritið reiknar út mælikvarða og misvísun. Einnig reiknar það út yfirborðsfjarlægð og áttarhorn milli landfræðilegra hnita. Athugið: Þegar varpað er á milli mismunandi hnitaforma (t.d. landfræðileg yfir í Lambert) tapast engin nákvæmni. En vörpun milli viðmiðana krefst staðbundinna vörpunarstika (transformation parameter). Vörpunarstikar sem eru í grunnstillingum Cocodati gilda fyrir allt Ísland með ±5m frá/til Hjörsey55 og ±25m frá/til Reykjavík1900. Vörpunarnákvæmnin frá ISN93 yfir í ISN04 er ± 3 cm en þess ber að geta að á svæðum þar sem jarðhræringar hafa átt sér stað eftir 2004 er nákvæmnin minni. Sé þörf á meiri nákvæmni (eða staðbundin hnitakerfi notuð) er notendum ráðlagt að nota mælda staðbundna stika.